«Жүрек жылуы» акциясының аясында Түркістан облысы бойынша мешіттерден көмек үзіліп жатқан жоқ. Карантин басталғалы Түркістан, Кентау қалалары мен Жетісай, Сайрам, Созақ, Келес, Ордабасы, Түлкібас, Төлеби, Отырар, Сарыағаш аудандарының әрқайсысында 70-80 отбасыдан қайырымдылық шарасының шарапатын көрді.

Жетісай аудандық орталық мешітінің ұйымдастыруымен екі күннің бірінде 25 мұқтажға жәрдем берілуде. Күні бүгінге 125 тұрмысы төмен, асыраушысынан айрылған, көп балалы отбасыға азық-түлік үлестірілді.

Бұл жұмыстар жалғасады. Имамдар тобы құрылып, кәсіпкерлер мен саудагерлермен кездесіп, қайырымдылық шараларынан шет қалмауға, сондай-ақ, азық-түлік бағасын көтермеуге шақырып жүр. Облыс имамдары қиындықта жомарттық танытып жатқан азаматтарға Бас Мүфтидің атынан ризашылықтарын білдіреді.