Бүгін Қазақстан мұсылмандары діни басқармасының төрағасы, Бас мүфти Наурызбай қажы Тағанұлы елордадағы «Астана» медресе-колледжінің ұлдар бөліміне арнайы барып, шәкірттерге «Нәпсімен күресудің жолдары» тақырыбында дәріс оқыды.

«Нәпсімен күресу, оны тәрбиелеу – адам баласының екі дүниеде бақытты не бақытсыз болуын айқындайтын негізгі себептердің бірі. Сондықтан, нәпсімен күресу – дінімізде үлкен жиһад деп танылады. Ислам тарихында орын алған «Тәбук» шайқасынан кейін, сахабалар сусыз шөл далада шаршап-шалдығып, қарындары аш күйде кері қайтып бара жатқанда Пайғамбарымыз (оған Алланың салауаты мен сәлемі болсын): «Кіші жиһадтан (жорықтан) үлкен жиһадқа (нәпсімен күресуге) оралдық», – деп айтқан. Қасиетті Құранда нәпсіге қатысты бірнеше аятта баян етеді:
«Расында нәпсісін тазартқан кісі құтылды. Әлде кім оны кірлетсе, қор болды», – деген («Шәмс» сүресі, 9, 10-аяттар)»,- деді Бас мүфти Наурызбай қажы Тағанұлы.

Сондай-ақ ҚМДБ Төрағасы медресе-колледждің тыныс-тіршілігімен танысып, ұстаздар мен студенттерді алда келе жатқан Республика күнімен құттықтап, білім жолында талапты болуға тілектестік білдірді.