Қарағанды қаласынжа ҚМДБ Әйел-қыздар секторының ұйымдастыруымен «Сағындым сені Мұхаммед» тақырыбында рухани мәуліт кеші өтті.

Рухани іс-шараға сектор меңгерушісі Динара Құтқожақызы арнайы қатысып, әйел жамағатына уағыз-насихат айтты. Ардақты Пайғамбарымыздың (оған Алланың салауаты мен сәлемі болсын) өмір жолынан мысалдар келтіріп, әсіресе, Алла елшісінің әйел адамдармен, жұбайлары, қыздарымен қарым-қатынасы қандай болғанына тоқталды.

Кешке жиналған аналар, қыз-келіншектер Пайғамбарымызға сәлем-салауат жолдап, ел амандығы үшін дұға жасады. Сондай-ақ қатысушы әйел жамағаты арасында ұтыс ойнатылып, қала тұрғынына ұмра қажылығына жолдама бұйырды.