Бүгін, қасиетті жұма күні ҚМДБ Төрағасы, Бас мүфти Наурызбай қажы Тағанұлының бұйрығымен Ұлытау облысының Сәтбаев қаласына бас имам болып Еркебұлан Такеев тағайындалды.  

Ол 2018 жылдан бастап қазірге дейін Сәтбаев қалалық «Балмағамбет Балқыбайұлы» мешітінің наиб имамы қызметін атқарды. Ал өздеріңізге белгілі бұған дейін қаланың бас имамы қызметін атқарған Бейбіт Жансарин Бас мүфти бұйрығымен ҚМДБ-ның Ұлытау облысы бойынша бас имамы қызметіне тағайындалған болатын.

«Балмағамбет Балқыбайұлы» мешітінде бүгінгі жұма уағызын Ұлытау облысының бас имамы Бейбіт Бақытжанұлы жүргізіп, «Пайғамбарымыздың (оған Алланың салауаты мен сәлемі болсын) жеке тұлғасы» тақырыбында уағыз айтты. Сондай-ақ жамағатқа қаланың жаңадан тағайындалған бас имамы Еркебұлан Ермекұлын таныстырып, алдағы қызметіне сәттілік пен береке тіледі.

Ал жұма намаздан кейін «Балмағамбет Балқыбайұлы» мешітінің жамағаты имамдық қызметін атқарған Бейбіт Бақытжанұлын құрметпен шығарып салып, дәстүр бойынша иығына шапан жапты. Одан бөлек Сәтбаев қаласының әкімі Бейбіт Бақытжанұлын алғыс хатпен марапаттап, алдағы қызметіне толағай табыстар тіледі. Бейбіт Бақытжанұлы бұрын қызмет еткен Теміртау қалалық мешітінің жамағаты да бүгін арнайы келіп, Ұлытау облысының бас имамына темір тұлпар сыйға тартты.