Таң

Күн

Бесін

Екінті

Ақшам

Құптан

Ақтөбе: 150 отбасыға «Рамазан қоржыны» табысталды

Ақтөбе облыстық орталық «Нұр Ғасыр» мешітінің баспасөз қызметі nurgasyr.kz 29.03.2024 503 0 пікір
Ақтөбе: 150 отбасыға «Рамазан қоржыны» табысталды

Ақтөбе облыстық орталық «Нұр Ғасыр» мешітінде қасиетті Рамазан айының құрметіне орай ҚМДБ «Зекет және қайырымдылық» қорының өңірдегі өкілі Алмат Әлидің ұйымдастыруымен 4 тонна 500 кг азық-түлікті қамтыған «Рамазан қоржыны» 150 отбасыға табысталды. 

Қасиетті Рамазан айында сауаптар 70-тен 700 есеге дейін еселенеді. Яғни, бұл айда жасалған әрбір игі амал ерекше. Осындай жақсылықтың бірі ретінде «Рамазан қоржыны» деп аталатын ауқымды қайырымдылық шарасы облыстық «Нұр Ғасыр» мешітіндегі дін жанашыры Ардақ Садақбайұлының зекетін беруімен және «Анвар» сауда желісінің демеушілігімен өтті.

Сонымен қатар арнайы тізім бойынша шақыртылып, көмек алуға жиналғандардың алдына облыстың бас имамы Серікжан Еншібайұлы Рамазан айымен құттықтап, зекетін беріп, демеушілік жасаған жандарға Алла разы болсын деп игі тілегін білдірді. «Рахым айында берілген садақаның сауабы еселеп артады. Сондықтан жағдайы бар адамдар ораза кезінде Зекет беруге асыққаны абзал. Алла Тағала зекетін берген адамның өмірін берекелендіріп, күнәсынан тазартатындығы айтылады. Алайда, адам сол ең жақсы көрген дүниесін Алла жолында бөлісуімен құлдығы шынайыланбақ. Пайғамбарымыз (оған Алланың салауаты мен сәлемі болсын): «Зекет – Исламның көпірі» деу арқылы әлеуметтік өмірдегі теңдікті сақтаудың негізі екендігін айтқан.

Рамазанда Ардақ Садақбайұлының зекет ретінде таратуы – Алла Тағаланың бұйрығына бағынуы деп бағалаймыз. Біз басқа да кәсіпкер азаматтарды өз Зекетін мұқтаж отбасылармен бөлісіп, осындай сауапты іске атсалысуға шақырамыз», - деді облыстың Бас имамы. Шара қортындысында көп балалы т.б аналар ұйымдастырушылар мен кәсіпкерлерге алғысын айтып, ақ батасын берді. Одан өзге облыстың бас имамы Серікжан Еншібайұлы БАҚ өкілдеріне шараның маңыздылығы туралы сұхбат берді. Қайырымдылық шаралары әлі де жалғасын табады.

Пікірлер (0)

Тіркелген қолданушылар ғана пікір қалдыра алады. Сайтқа кіру