Қарағанды облысының бас имамы Естай Айтуғанұлы елордаға барған іссапары барысында «Астана» медресе-колледжінің шәкірттерімен жүздесіп, сұхбат құрды.

Облыс бас имамы медресенің тыныс-тіршілігімен танысып, шариғи білімін шыңдап жүрген жастарға ақыл-кеңестерін бөлісті. Сондай-ақ, әрбір студенттің әлеуметтік жағдайы, оқу барысы, үлгерімімен жекелей танысып, өтініш-тілектерін тыңдады

«Білім алып, ғылым игеру асқан сабырлылық пен ынта-ықыласты қажет етеді. Руханият қызметшісі болуды мақсат еткендіктен, осы жолда талмай-тынбай еңбек етіп, тер төгуіңіз керек. Сіздердің міндеттеріңіз – қазақ халқының тарихымен сабақтас ислам діні құндылықтарын насихат етіп, ел руханиятын көтеру»,- деді Естай Айтуғанұлы.

Асыл дініміздің көкжиегін кеңейтіп, дәстүрлі құндылықтарымызды насихаттау үшін шәкірттерге жүктелер міндет пен абыройдың да салмағы ауыр екенін айтып, ел мен жерге қалтқысыз қызмет қылуға үндеді.

Сондай-ақ, қазіргі таңда Қарағанды облысы бойынша «Астана» медресе-колледжінде білім алып жатқан шәкірттерді Қарағанды өңірінен іс-тәжірибеден өтуге, қызмет етуге шақырды.