Жуырда ғана Батыс Қазақстан облысының бас имамы қызметіне тағайындалған Самат Әлібаев, наиб имам Ерденбек Ихсанов пен есепші Анар Шукина Орал қаласындағы Тәжіден Батырұлы мен Түлбаев Мұхаммед-Ғариф атындағы мешіттерді аралап шықты.

Ондағы бас имамның мақсаты – қала мешіттерінің тыныс-тіршілігімен және ондағы дін қызметкерлерімен жақын танысу. Самат Қанатқалиұлы аталған мешіттерде болып, ондағы тыныс-тіршілікпен танысып, әрбір мешіттің ұжымдарымен жеке-жеке кездесу жиындарын өткізді.

Жиын барысында бас имам осыған дейін атқарылып келген шараларды жандандырып, одан әрі біріге отырып жалғастыру қажеттігіне баса назар аударды.

Сондай-ақ, әр мешіттің ішкі-сыртқы тазалығына, жұмыс тәртібіне аса мән беріп, имам деген атқа кір келтірмей соған сай елмен жақын болып, аянбай қызмет жасауға шақырды.

Қала имамдары мен қызметкерлер емен-жарқын жүздесіп, ой-пікір алмасқан бас имам Самат Қанатқалиұлының жаңа қызметіне табыс тілеп, елдің бірлігі мен асыл дініміз исламның кең қанат жаюына қолдау білдіретіндіктерін жеткізді.