25 қазан – Республика күніне орай Ақтөбе қалалық орталық мешітінде бас имам Нұрлыбек Шакизадаұлының және Ақтөбе қалалық дін мәселелері және қоғаммен байланыс орталығының басшысы Сансызбай Жәдігерұлының бастамасымен спорт шарасы өтті.

«Ислам – ынтымақ пен бірлік діні» жылы аясында жамағат арасындағы татулық пен бірлікті арттыру мақсатында екі салмақ бойынша гір тасын көтеру, қол көтеру сынды сайыс ұйымдастырылды. 

Білектің күшімен сынға түскен қатысушылар өз мүмкіндігін мүлт жібермей, белсенділік танытты. Сайыс нәтижесі бойынша озық шыққан  І орын иегеріне смартфон, ІІ және ІІІ орын жүлдегерлеріне шаңсорғыш пен планшет табысталды. Елдің амандығы мен баянды берекесін тілеген жамағат ұйымдастырушыларға алғыс білдірді.