Алматы қаласының Әуезов ауданына қарасты «Мүзаммил» мешітінде Құран Кәрімді жатқа оқудан қыздар арасында ІІ республикалық байқауына іріктеу сайысы өтті.

Іріктеу сайысын Алматы қаласының бас имамы Төлеби Дәділұлы ашып берді. Алла Тағала Құран Кәрімде игілікте жарысуды бұйырған болатын. Яғни Алланың кәламын жаттау мен оқу арқылы жарысуға үндеді. Хақ Тағаланың осы үндеуін орындау мақсатында, Қазақстан мұсылмандары діни басқармасы 2016 жылы Алматы қаласында Құранды жатқа оқудан қыздар арасында тұңғыш республикалық байқау өткізген болатын. Енді міне, екінші байқау 9-10 наурыз аралығында ел астанасы Нұр-Сұлтан қаласында өтеді.

Қыздар арасында Құран Кәрімді жатқа оқудан ІІ республикалық байқау қарилардың Құран Кәрімді оқу және жаттау деңгейін көтеру, өзара тәжірибе алмасу, мұсылман жамағатының құрани сауатын көтеру арқылы қоғамның руханиятын арттыру мақсатында ұйымдастырылып отыр.

Осы орайда Алматы қаласы бойынша іріктеу кезеңіне 11 қыз қатысып, Құранның 20 парасынан І орынды Нұртуған Фатима иеленсе, 10 парадан І орынды Сейітқасым Жанел Серікқызы иеленіп, үздік шықты. Ал Құран Кәрімнің 5 парасы бойынша 9 қыз қатысып:

І орын Ералиева Мадина

ІІ орын Өнерқызы Айшаға 

ІІІ орын Азаматқызы Хадижаға бұйырды.

Ал қалған қатысушы қыздар Ажибаева Айша, Әбдеш Айдана, Әбішева Әсел, Әбілханова Жансая, Шабен Фариза, Өнерқызы Қайша ынтыландыру сыйлықтарын қанағат тұтты.