Tań

Kún

Besіn

Ekіntі

Aqsham

Quptan

Қостанай: Ауылда намазхана ашылды

Қостанай облыстық мешітінің баспасөз қызметі akmechet.kz 27.07.2022 3614 0 пікір
Қостанай: Ауылда намазхана ашылды

Қостанай облысы Жангелдин ауданы Шеген ауылының тұрғындары 2021 жылы «Туған жерге тағзым» жобасы аясында игілікті істің жаршысы болып, намазхана ашу үшін қаржы жинап, құрылыс жұмыстарын бастаған болатын.

Оның басы-қасында болып, бас демеушілік еткен Бақытжан Міркемелұлы осыған дейін елдімекен сыртындағы қорымдардың қоршауына мұрындық болып, халықтың ыстық ықыласына бөленген.

Осылайша көптен күткен «Мұхамедғали Қожаұлы» (Кәтен Дәмолда) атындағы намазхананың салтанатты ашылуы өтті. Оған жер-жерден, аудан-қалалардан дін қызметкерлері мен басқа да қонақтар арнайы келді.

Алғаш сөз алған дін қайраткері Бектұрсын Торғайбайұлы Қостанай облысының бас имамы Бахытбек Тәжімбеттің ыстық сәлемін жеткізіп, игі тілегін айтты. Аталмыш намазхананың бой көтеруіне бірден-бір ұйытқы болған Бақытжан Міркемелұлына облыс имамының Алғыс хатын табыс етті.

Сонымен қатар, құрылыс жұмыстарына қол ұшын берген ауыл тұрғындарына да құрмет көрсетілді. Аудан әкімінің орынбасары Айдаралы Талпақов аудан басшысының атынан жиналғандарды үлкен қуаныштарымен құттықтап, естелік сыйлықты тапсырды.

Алаштың ақиық ақыны, айтыстың ақтаңгері Айбек Қалиев арнау айтты. Ауылдық ардагерлер кеңесінің төрағасы Қанатбек Ерғалиев, ауыл әкімі Елдос Едіресов намазхананың салынуына атсалысқан барша бауырларымызға шынайы алғысын жеткізіп, олардың иықтарына шапан жапты.

Намазхана салтанатты түрде ашылған соң бесін намазы оқылып, ақ шаңқай киіз үйлерде ас берілді.

Имандылық ордасының ашылу құрметіне спорттың күрес түрінен жарыс ұйымдастырылды. Онда 50-65 келі салмақ бойынша палуандар боз кілемде белдесті. «Түйе палуан» атағын арқалықтық Айбат Сейтенов жеңіп алды. Оған ұмра қажылығына жолдама табысталды.

Сондай-ақ, гір көтеру, арқан тартыс, қой көтеру сынды ұлттық спорт түрлеріненде жүлдегерлерге арнайы сыйлықтар салтанатты түрде табыс етілді.

Pіkіrler (0)

Тіркелген қолданушылар ғана пікір қалдыра алады. Сайтқа кіру