«Ислам – ынтымақ және бірлік діні» жылы аясында Өскемен және Семей аймағының имамдарының кезекті басқосуы өтті.

Өскемен аймағының бас имамы Ермек Қасболатұлымен Семей аймағының бас имамы Асқар Әбітайұлы бастаған имамдар Өскеменде «Халифа Алтай» мешітінде кездесу өткізіп, бірқатар іс-шараларды талқылады.

Кездесуде Өскемен аймағының бас имамы Ермек Қасболатұлы: «Ислам – бірліктің, ынтымақтың діні. Биыл ҚМДБ аясында «Ислам – ынтымақ және бірлік діні» жылы деп жариялануы тегін емес. Екі өкілдіктің бір-бірімен тығыз байланыста болып, іс-тәжірибе алмасуы аса маңызды, қазіргі жұмыс дағдысына өте керек тәсіл. Дінімізде мұсылмандардың өзара бауырмалдығы бірінші кезекте тұруы тиіс деген асыл тағылымдар бар» дей келе, өкілдіктердің өзара ынтымақтастықта жұмыс атқаруының маңыздылығына тоқталды.

Бас имам сонымен қатар алдағы кезеңде екі өкілдіктің өзара байланысы одан ары дами беретіні жайлы айтып өтті.

Семей аймағының бас имамы Асқар Әбітайұлы өкілдіктердің ынтымақтастықта жұмыс атқаруы нәтижесінде асыл дініміздің құндылықтарын насихаттау бағытында бұған дейін де бірқатар шаралар атқарылғанын жеткізіп: «Өкілдіктер үшін қызмет те, мақсат та, мүдде де ортақ. Ол асыл дініміз Исламның құндылықтарын насихаттау. Біз жан жақты өзара байланысымызды арттыра отырып, дін қызметін дамыта береміз. Бұл жолғы кездесу жұмысымызға тың серпін береді» деп атап өтті. Ол өз сөзінде әсіресе имамдардың біліктілігін жетілдіру, жат ағымдарға қарсы күресте бірлескен қимылдар жасалғанын баса айтып өтті.

Екі аудан имамдары өзара пікір алмасып, алдағы уақытта бірлескен іс-шаралар ұйымдастыру жайын ақылдасты.