Нұр-Сұлтан қаласындағы «Назарбаев зияткерлік мектебінің» асханасы «QMDB Halal» сертификатына ие болды.

Елордадағы ғылым, экономика және саясат саласында дарынды балаларға арналған таңдаулы мектептің бірі саналатын білім ордасындағы асхана «Тамақтандыру қызметтері», «Халал өнімдерді өндіруге, өңдеуге, дайындауға, сақтауға, тасымалдауға және сатуға қойылатын жалпы талаптар стандартына» сай деп танылды. «Халал Даму» директоры Айбек Асқарбекұлы мұсылмандардың қара шаңырағына келген Назарбаев зияткерлік мектебінің өкіліне «QMDB Halal» сертификатын табыстады.

«Білім ордасы 2008 жылы елбасы Н.Ә. Назарбаевтың бастамасымен елордада негізі қаланып, он үш жылдың ішінде еліміздің барлық өңірлерінде ашылды. Зияткерлік мектеп білім берумен ғана шектелмей, таза да сапалы, адал азық-түлікпен балаларды қамтамассыз ету арқылы жас ұрпақтың жан-жақты дамуына жағдай жасайды. Бұдан былай, мектеп асханасында ұсынылатын тағамдар «QMDB Halal» стандарт талаптарын сақтай отырып, әзірленетін болады», – дейді А.Асқарбекұлы.

«Жеңс Транс Сервис» кәсіпорнына тіркелген Назарбаев зияткерлік мектебі асханасына берілген «QMDB Halal» сертификаты 18.10.2021-17.10.2022 мерзімі аралығында жарамды.