Таң

Күн

Бесін

Екінті

Ақшам

Құптан

Қазақстан Кейт Бланшеттке рохинджа-мұсылмандарының тағдырына араласқаны үшін алғыс білдірді

bnews.kz 31.08.2018 3266 0 пікір
Қазақстан Кейт Бланшеттке рохинджа-мұсылмандарының тағдырына араласқаны үшін алғыс білдірді

Қазақстанның Біріккен Ұлттар Ұйымы жанындағы тұрақты өкілі Қайрат Омаров БҰҰ Қауіпсіздік Кеңесінің Мьянмадағы ахуал бойынша өткен отырысында босқын рохинджа-мұсылмандарының проблемаларын шешуге қатысты белсенді атсалысқан актриса Кейт Бланшеттке алғыс білдірді, деп хабарлайды BNews.kz. Бұл туралы Қазақстанның БҰҰ жанындағы тұрақты өкілінің кеңесшісі Әнуар Жайнақов өзінің Facebook-тегі парақшасында жариялады.

"Бүгін Қайрат Омаров БҰҰ Қауіпсіздік Кеңесінің Мьянмадағы ахуал бойынша өткен отырысында босқын рохинджа-мұсылмандарының проблемаларын шешуге қатысты белсенді атсалысқан танымал актриса, БҰҰ Босқындар ісі жөніндегі агенттігінің ізгі ниетті елшісі Кейт Бланшеттке алғыс айтты", - деп жазды Әнуар Жайнақов. 

Кездесу барысында БҰҰ Бас хатшысы Антониу Гутерриш және БҰҰ Босқындар ісі жөніндегі агенттігінің ізгі ниетті елшісі, актриса Кейт Бланшетт Мьянмадағы рохинджа-мұсылмандарының жағдайы туралы баяндамаларын жасады.

Қазақстан Елшісі дәл осыдан бір жыл бұрын Мьянмадан Бангладешке 700 мыңнан астам рохинджа-мұсылмандары қашқан кезде халықаралық қоғамдастық ең ірі гуманитарлық апаттардың біріне куә болғанын атап өтті.

"Ең таңқаларлығы – рохинджа-босқындардың 60 пайызы үйлерінен кетуге мәжбүр болған және біз сәуір айында Бангладеште өзіміз көргеніміздей босқындар лагерлерінде өте қиын жағдайға тап болып отырған балалар", - деді Қайрат Омаров.

Қазақстан БҰҰ және барлық гуманитарлық әріптестердің рохинджа-босқындарға азық-түлік, баспана, дәрі-дәрмектер, су және басқа да көмек көрсету құралдарын ұсынуға бағытталған күш-жігерін жоғары бағалайды.

ҚР Сыртқы істер министрлігінің мәліметінше, осы жылдың сәуір айында Қазақстан Үкіметі Бангладештегі Кокс-Базар қаласының маңында орналасқан рохинджа-босқындарға 500 мың доллар көлемінде гуманитарлық көмек көрсетіп, оны олар тұратын жерлерге жеткізді.

Мьянмадағы қазіргі жағдай туралы айта келе, Қайрат Омаров БҰҰ-ның мәліметтері бойынша этникалық рохинджа халқы өкілдерінің жүріп-тұру бостандығына, сондай-ақ білім алу, денсаулық сақтау және өмірлік дағдыларына қол жеткізуге қатаң шектеулер әлі қалуда екенін атап өтті.

"Рохинджа-босқындары кепілдікті қауіпсіздікті және осы мәселелер бойынша нақты прогресті көріп тұрған кезде ғана олар елге оралады", - деп баса айтты Қазақстан елшісі.

Қазақстанның Тұрақты өкілі, сондай-ақ Мьянмадағы Рохинджа халқының құқықтарын бұзушылықтарды тергеу бойынша тәуелсіз комиссия құруын татуластыққа және өтпелі әділеттілікке бағытталған негізгі қадамдардың бірі ретінде атады. Сонымен қатар, ол Комиссияға мұсылман қауымдастығының өкілін қосу оның беделін едәуір арттырып, "көпірлерді салуға" көмектесуге мүмкіндік бере алатындығын атап өтті.

Жалпы, БҰҰ Қауіпсіздік Кеңесінің мүшелері рохинджа-босқындардың проблемаларын Мьянмадағы бұрынғы тұрғылықты жерлерге қауіпсіз, қайырымды және өз еркімен оралуы үшін тез арада шешу қажеттігі туралы бірауызды болды.

Пікірлер (0)

Тіркелген қолданушылар ғана пікір қалдыра алады. Сайтқа кіру