Алланың Елшісіне (Оған Алланың игілігі мен сәлем болсын) ең алғаш түскен: «Оқы! Сені жаратқан Раббыңның атымен оқы!», – деп басталатын «Алақ» сүресінің алғашқы аяттары еді. Яғни, Жаратқан Иенің атымен оқу, білім алу парасаттылыққа қол жеткізудің негізгі баспалдағы. Мұсылмандықтың қырық парызының бірі – білім іздеу. Осыларды басшылыққа алған қазақ ағартушысы Ыбырай Алтынсарин бабамыз балаларды білімге шақырғанда: «Бір Аллаға сыйынып, Кел, балалар, оқылық», – деп, білімді Алланың атымен бастап, білім алуға насихаттаған.

Бүгін Павлодар қаласындағы «Әбу Бәкір Сыддық» медресе-колледжін бітіруші шәкірттері мемлекеттік емтихан тапсырды. Шәкірттер алдын қазақстан тарихы пәнінен сынақтан өткен болса, бүгін Құран, фиқһ, араб тілі пәндерінен тапсырды.

Аталмыш емтиханды ҚМДБ-ның Жалпы және жастар бөлімінің басшысы Алтынбек Ұтысхан, облыстық орталық «Мәшһүр Жүсіп» мешітінің бас имамы Исенов Нариман, «Астана» медресесінің ұстаздары Бердібек Оянған мен Мүсайып Нұрғисалар  қабылдады. Аталмыш медресені  2016-2017 оқу жылы табысты бітіріп, мемлекеттік емтихан тапсырған 8 түлектің    үшеуі «Өте жақсы», 4-еуі «Жақсы», қалғаны қанағаттанарлық үлгерім көрсетті.  Олар «Исламтану» мамандығы  бойынша  имам-хатиб біліктілігі дипломын алды.

Биылғы бітіруші шәкірттердің 5-і Павлодар облысынан, ШҚО-нан -1, ал қалған 2-і Қарағанды облысынан келіп білім алған шәкірттер.

«Бүгінде «Әбу Бәкір Сыддық» медресе-коледжінде 30-дан астам шәкірт білім алуда, ал алдағы 2017-2018 оқу жылында облыстардан жаңадан 25 шәкірт қабылдауға жоспарлап отырмыз»,-дейді өкіл имам Нариман Ермекұлы.

 Бірер күндерде  ілім деген аманатты арқалап үлкен өмірге қадам басатын түлектерге  Алла Тағала алдағы жолдарын ашсын деп тілейміз!