Қазақстан мұсылмандары діни басқармасының төрағасы Наурызбай қажы Тағанұлы Павлодар облысына барған сапарында «Таза Қазақстан» республикалық экологиялық акциясы аясында «Әбу Бәкір Сыддық» медресе колледжінің ауласына ағаш егу іс-шарасына қатысты.

Ағаш егу іс-шарасында Бас мүфти: «Өздеріңізге белгілі, Мемлекет басшысы Қасым-Жомарт Кемелұлының бастамасымен еліміз бойынша «Таза Қазақстан» республикалық экологиялық акциясы жүзеге асуда. Бұл бастамаға жер-жердегі дін қызметкерлері де үлес қосуда.

Асыл дінімізде айналаны абаттандыру, тазалау, көгалдандыру жұмыстарына үлес қосу сауапты істердің бірі саналады. Бұл – жас ұрпақты ізгілік пен еңбекқорлыққа баулитын бастама. Сондықтан біз мұндай өнегелі істерді жан-жақты дәріптеуге көңіл бөліп келеміз» деді.

Айта кетейік, Қазақстан мұсылмандары діни басқармасы «Таза Қазақстан» акциясын қолдай отырып, еліміздің әр өңірінде ағаш егу және тазалық іс-шараларын тұрақты түрде ұйымдастырып келеді.