БАС МҮФТИ ПАЛЕСТИНА ПРЕЗИДЕНТІНІҢ КЕҢЕСШІСІН ҚАБЫЛДАДЫ

muftyat.kz

Қазақстан мұсылмандары Діни басқармасының ресми сайты

Update Required To play the media you will need to either update your browser to a recent version or update your Flash plugin.

Қазір 07:10:21

18 Қаңтар 2026

29 Ражаб 1447 Хижра

ДІНИ МЕРЕКЕЛЕР

БАС МҮФТИ ПАЛЕСТИНА ПРЕЗИДЕНТІНІҢ КЕҢЕСШІСІН ҚАБЫЛДАДЫ

ҚМДБ Баспасөз қызметі

muftyat.kz

01.12.2025

2076

0 пікір

– | A | +

БАС МҮФТИ ПАЛЕСТИНА ПРЕЗИДЕНТІНІҢ КЕҢЕСШІСІН ҚАБЫЛДАДЫ

Бүгін Астана қаласындағы мүфтият ғимаратында Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы Палестина Президентінің дін істері мен исламдық қатынастар жөніндегі кеңесшісі, Палестина Жоғарғы сот төрағасы, Палестина Шариғат соты кеңесінің басшысы Махмұд Әлхаббаш мырзамен екі жақты кездесу өткізді.

«Қазақстан мұсылмандары діни басқармасы әрқашан Палестина халқының жағдайына алаңдаушылық білдіріп келеді. Біз қасиетті Құдыс жерінде қайғылы оқиға орын алғанда Діни басқарманың ресми мәлімдемесін жарияладық. Бүкіл әлемге Палестина халқының халықаралық келісімдер мен резолюцияда бекітілген тарихи құқығын қолдайтындығымызды ашық түрде жария еттік.

Сонымен қатар мұсылман елдерінің дін көшбасшылары мен бүкіл Ислам үмбетіне үндеу жолдадық. «Бір мезетте – бір дұға» бастамасы аясында мешіттерімізде Газа халқы үшін арнайы дұға жасау іс-шарасын өткіздік. Бұл бастаманы мұсылман елдерінің дін көшбасшылары қолдады. Біздің бастамамызға қолдау білдірген еліміздегі барша елшілерге тағы да алғысымды білдіремін.

Жуырда Астана қаласындағы Республикалық Бас мешітте өткен ІІ Халықаралық Құран жарысы кезінде Палестинадан келген қариға арнайы «Көрермен көзайымы» номинациясын табыстап, өз тарапымыздан рухани тұрғыдан қолдау көрсеттік», – деді Бас мүфти Наурызбай қажы Тағанұлы.

Өз кезегінде Махмұд Әлхаббаш мырза Қазақстан мұсылмандары діни басқармасының атқарып келе жатқан жұмыстарына ризашылығын білдіріп, мүфтияттың діни келісім мен рухани үйлесімді нығайту тәжірибесін жоғары бағалайтынын атап өтті. Сондай-ақ ҚМДБ-мен қалыптасқан ынтымақтастықты жалғастыруға ықылас танытты.

Кездесу соңында тараптар қайырымдылық көмек көрсету мақсатында ҚМДБ-ға қарасты «Зекет және қайырымдылық» қорымен Палестинадағы ресми қайырымдылық қоры арасындағы серіктестік орнату бойынша уағдаласты. Сондай-ақ, ортақ бағыттар жөнінде пікір алмасып, алдағы уақытта өзара байланыстарды дамыту мүмкіндіктерін қарастыруға ниет білдірді.