Қарағанды облысы Теміртау қаласының «Әлихан Бөкейхан» атындағы орталық мешіті ел Тәуелсіздігінің 30 жылдығына орай мешіт жамағаты арасында шағын футболдан турнир ұйымдастырды. 

Арнайы спорт алаңында «Тәні саудың – жаны сау» ұранымен өткен доп додасына аға буын өкілдері мен жастардан құралған 15 команда қатысты. 

​Жамағаттың ауызбіршілігін арттыру, ынтымақтастығын нығайту және салауатты өмір салтын ұстануға бағытталған спорттық іс-шара шымылдығын Теміртау қаласының бас имамы Естай Айтуғанұлы ашып, жарысқа қатысушы командаларға сәттілік тіледі. 

​Спорттық додадағы әр ойын қызу да тартысты өтіп, жарыс нәтижесінде І орынды «Барыс» командасы иеленсе, ІІ орын «Тарлан» командасына, ал ІІІ орын «Сұлтан» командасына бұйырды. 

Жүлделі орын иегерлеріне 50 000 , 30 000, 20 000 мың теңгеден берілді. Бұдан бөлек, аталмыш командалар арнайы кубоктармен және алғыс хаттармен марапатталды. 

Турнир барысында жақсы ойнымен көзге түскен командаларға, сондай-ақ үздік ойыншы, үздік қорғаушы, үздік қақпашы аталымдары бойынша озық шыққан ойыншыларға құнды сыйлықтар табыс етілді.