Наурыз мейрамына Шығыс Қазақстан облысы Тарбағатай ауданы Ақжар ауылдық «Байжігіт баба» мешіті аламан бәйге өткізді.

Бәйге десе елеңдеп тұратын атбегілер бұл жарыстан шет қалған жоқ. Бәйгеге аудан көлеміндегі оза шауып жүрген өрен жүйріктер қосылды. Дала төсін дүбірге бөлеген аламан қызықты болды. Көмбеге шалдықпай жеткен жүйріктерге «Байжігіт баба» мешітінің бас имамы Аманкелді Жарасов сыйлықтар табыс етті.

«Бәйгені Наурыз мейрамына орай ұйымдастырып отырмыз. Ұлттық ат спортын қолдау, насихаттау, жастардың ұлттық спортқа деген қызығушылығын ояту қазіргі таңда аса маңызды. Бәйге қызықты өтті» деп атап өтті Аманкелді Жарасов.

Шараны тамашалауға жиналған ауыл жұрты аламанның қызықты өткенін айтып, оны ұйымдастырған ауыл мешітіне алғыс білдірді.