Бүгін ҚМДБ-ның Жамбыл облыстық Әйел-қыздар секторы мен Жастар ісі секторының жауапты мамандары, сондай-ақ әжелер алқасының төрайымы Жәмилә Жұмабаева, «Бегалы ата» мешітінің имамы Бекболат Мыңбаев отты өлеңдерімен талайлардың жүрегін жаулаған нәзік ақын, журналист Күләш Ахметованың шаңырағына арнайы барды. 

Поэзиясымен оқырманның көңіліне көктем орнатқан ақынға осы гүл көктемнің алғашқы мерекесі Алғыс айту күнінің қарсаңында сыйлық алып, алғыс айта барған жастарға қалам иесі де өз разышылығын білдіріп: «Маған көптеген зиялы қауым өкілдері, неше түрлі кісілер кездесуге келді, алайда осындай жүрегінде Алласы бар жамағаттың жиналып келуі бірінші рет» - деді ағынан жарылып.

Жастар ісі секторының жетекшісі Нұрсұлтан Маметбай дастархан басында Құран оқып Алланың кәләмімен жүректерді тербетсе, ақынның жолдасы, ақын, жазушы Қайырбек Асанов айтулы мерекеге арнап шығарған «Мың алғыс» атты өлең шумақтарын оқыды.

Қос әдеби тұлғаның жеке кабинетін, кітапханасын аралаған көпшілік жаңа басылым көрген шығармаларымен танысты. Күләш Ахметова Әжелер алқасының төрайымы Жәмилә Жұмабаевға бір-екі кітабын сыйға тартты. 

 Әдемі отырыс, әсерлі жүздесу соңында қара өлеңнің қос қанаты жастарға рақметін айтып, баталарын берді.