Алматы қаласындағы «Абдулла» мешітінде имамдардың білімі мен біліктілігін арттыруға арналған «Құран Кәрім ғылымдарына кіріспе» атты семинар-тренинг өтті.

Бұл басқосуға Алматы қаласының бас имамы Еркінбек Шоқай, Алматы орталық мешітінің ұстазы Талғат Сапанов, Түрксіб ауданының бас имамы Саттарқұл Мейрман, Нұр-Мүбарак университетінің ұстазы, PhD доктор Құрманғазы Садыбаев және қала мешіттерінің ұстаздары қатысты.

Жиында алғаш сөз алған бас имам Еркінбек Шоқай білім семинарының маңыздылығы мен Құран ілімдерінің ерекшелігіне тоқталды. Сондай-ақ мешіт ұстаздарына уағыз-насихат пен оқу-ағарту жұмыстарын жандандыруға, еңбек тәртібі мен қызметтік әдеп нормаларын сақтауға, имамдар форумы мен Төралқа жиналысында қабылданған құжаттарды жамағат арасында кеңінен насихаттауға шақырды.

Содан кейін Нұр-Мүбарак университетінің ұстазы Құрманғазы Садыбаев Құран аяттарының сырлары туралы семинар өтізіп, имамдарға тәпсір саласының қызықты тұстарымен бөлісті. Құран ғылымдарының маманына мешіт ұстаздары толғандырған сұрақтарын қойып, тұшымды жауаптар алды.