Қостанай облысы Тобыл қаласындағы «Маңдай батыр» мешітінің ұжымы бас имам Асылхан қажы Түсіпбектің басшылығымен талай жүрекке қуаныш ұялататын қайырымды іс-шараларға ұйытқы болып келеді.

Соның бірі көпбалалы және мұқтаж отбасылардың кішкентай балаларының есінде сақталар ізгі шаралар ұйымдастырылды. Балалар ойын алаңдарында болып, шаттыққа бөленді. Сондай-ақ олар өздеріне ерекше таңсық жылқыларға мініп, табиғатты тамашалады. Шара барысында балдырғандар сырғанаққа барып, ұмытылмас әсер алды.

Балаларын айрықша ойын-думанға кенелткен мешіт ұжымына ата-аналар қауымы шын жүректен алғыс білдірді. Қандай бала болмасын, бақытты болуға лайықты. Олардың жүзінен күміс күлкі нышанын көрудің өзі бір ғанибет емес пе?!