ҚМДБ қызметінің дәстүрлі бағытының бірі – қайырымдылық. Осыған орай Маңғыстау облысының мешіттері жергілікті халықтың әлеуметтік тұрғыдан аз қамтылған санаттарына көңіл бөліп, мұқтаж жандарға көмек көрсетіп келеді.

«Бір аптада – бір игі іс» қайырымдылық акциясы аясында Бейнеу аудандық мешіті имамдарының ұйытқы болуымен әлеуметтік жағдайы төмен отбасыларға азық-түлік себеттері үлестірілді.

Қайырымдылық шарасы аясында 10 мұқтаж отбасыға арнайы дайындалған азық-түлік себеттері (10 келі ұн, 5 келі күріш, 5 келі макарон өнімдері, 5 келі қант, 5 келі картоп, 5 келі сәбіз, 3 келі пияз, тұз, сүт, сұйық май, шай) таратылды.

«2021 жылды қайырымдылық іс-шарасымен бастап жатырмыз. Алла әрбір ісіміздің қайырын берсін. Аталған іс-шарамызға белсенді атсалысып, қол ұшын берген азаматтарға алғыс білдіреміз. Алла ізгі ниеттерді сауаптан жазсын!» деді «Бейнеу» аудандық мешітінің наиб имамы Камалбай Юсупбайұлы.