«Қолыңнан келсе, қолғабыс ет!» атты қайырымдылық акциясы аясында Қарағанды қалалық «әл-Машани» мешітінің ұйымдастыруымен көше тазалықшыларына ыстық ас үлестірілді.

Игі шара барысында шаһарымызды қалың қардан тазартып, сауапқа толы қызмет атқарып жүрген 70 тазалықшыға 10 келі палау мен 6 литр ыстық шай берілді. Қала тазалықшылары осындай игі әрі берекеті мол шараны ұйымдастырған дін қызметкерлеріне алғыс айтып, ризашылық білдірді.

Алла Тағала Құранда:«Сендер адамдардың арасынан шығарылған қайырлы үмбет болдыңдар..» (Әли Имран, 110) деп мұсылмандарды жақсылық жаршылары ретінде сипаттап, ұдайы жақсылық жасауға шақырған. Жаратқан Иеміз Құран аяттарында мұсылмандарға қарата: «Жақсылық жасаңдар, сонда нағыз жетістікке жетесіңдер» деген. («Хаж» сүресі, 77-аят),  «Кімде-кім мысқалдай (тозаңның салмағындай) жақсылық жасаса, соның қарымын алады» («Зілзала» сүресі, 7-аят) деген болатын.

«Қолыңнан келсе, қолғабыс ет!» атты қайырымдылық акциясының мақсаты да осы – қасиетті кітапта айтылғандай, жақсылық жасап, қайырлы үмбет болуға ұмтылу.