ҚМДБ «Зекет» қорының Қызылорда облыстық өкілдігінің ұйымдастыруымен «Жылу сыйла», «Үміт сыйла сәбиге» акциялары аясында Сырдария ауданы Шаған ауылында тұратын көпбалалы отбасыға көмек көрсетілді.

Смайыловтар отбасы – жеті бала тәрбиелеп отырған үлкен шаңырақтың бірі. 2019 жылы дүниеге келген сүт кенжесі туғалы «Spina bifida» диагнозымен ауырып келеді, арқасы мен ішкі құрылыстарында «жарық» (грыжа) бар, небәрі 1 жыл ішінде жеті рет ота жасалған.

Шаған ауылына арнайы барған Сыр өңірінің бас имамы Болатбек Ұласқанұлы отбасының жай-күйімен танысып, кішкентай сәбиге Алладан шипа тіледі. Кіріс қаражаттары балаларының емінен ауыспайтын отбасыға 2 тонна көмір түсіріп, азық-түлік пен балаларға арналған сыйлықтар тарту етті. Бас имам алдағы уақытта да имамдар тарапынан қолдау көрсетіліп, бүлдіршіннің еміне көмек берілетінін жеткізді.