Қазақстан мұсылмандары діни басқармасының Маңғыстау облысы бойынша бас имамы Әнуар Ізімбайұлы Жаңаөзен қаласына арнайы барып, жергілікті ғибадат үйлерінің жылу маусымына дайындығымен танысты.

Аталмыш іс-сапар барысында, жақында ғана Жаңаөзен қаласының бас имамы болып тағайындалған Юнус Қадырқұлұлы Әнуар Ізімбайұлына шаһар мешіттерінің жай-күйіне байланысты өзгерістер мен қысқы маусымға дайындығы жайлы баяндап берді.

Жаңаөзен мешіттерінің тұрмыс-тіршілігімен танысқан бас имам Әнуар Ізімбайұлы, сондай-ақ, Рахат ауылдық «Рахат Ислам» және Қызылсай ауылдық «Мұханмедин Шихыұлы» мешіттерінің жанындағы құрылыс жұмыстарымен танысып, қыс мезгілінің жақындап қалуына байланысты дін қызметкерлеріне тиісті тапсырмалар берді.