Қарағанды облысына қарасты Теміртау орталық мешітінің ұйымдастыруымен игі шара жүзеге асты. 

Атап айтқанда, Қарағанды обылысы білім басқармасының №8 және сөйлеу қабілеті өте төмен балаларға арналған №5 мектеп-интернаты коммуналдық мемлекеттік мекемесіндегі балалар Теміртау орталық мешітінде арнайы қонақ болды.

Берекелі іс-шара барысында жеткіншектерге және тәрбиешілеріне арнайы мерекелік дастархан жайылып, балаларға сыйлықтар үлестірілді. Мешіттің бас имамы Естай Айтуғанұлы мерекелік дастархан басында ата-аналарға өзінің игі тілегі мен ізгі лебізін білдірді. 

«Әрбір балаға мейірім таныту, басынан сипау, махаббатын арнау, олардың тәрбиесіне, өсіп жетілуіне, қалыптасуына тұрақты көңіл бөлу – қасиетті дінімізде әрбір мұсылманның парызы, әрі сауабын арттыратын игі іс» деп атап өтті Естай Айтуғанұлы. 

Бас имам жеткіншектерді тәрбиелеп отырған ата-аналарға алғыс хат табыстап, шара соңында Құран оқылдып, бата берілді. Сауапты һәм берекелі шараны ұйымдастырған мешіт ұжымына дән риза болған тәрбиешілер алғыстарын жеткізіп, қуанышты күйде тарқасты.