Маңғыстау облысы Мұнайлы ауданындағы Ар-рахман мешітінің бас имамы Зиядолла Еміл Ақтаудағы №2 және №3 арнаулы қызметтер көрсету орталықтарында болып, қайырымдылық шарасына қатысты.

Қарттар үйінде қазір 100-ден астам тұрғын бар. Барлығы да денсаулықтарының төмендегінен және отбасы жағдайымен мемлекеттің қамқорлығына өткен. Ал №3 арнаулы әлеуметтік қызмет көрсету орталығында 4-18 жас аралығындағы 102 бала тіркелген. Аутизм, ДЦП, Даун ауруларына шалдыққан 54 бүлдіршін интернатта тұрып жатыр.

Орталық директоры Шаттыгүл Қаракүшікованың айтуынша, елдегі індетке байланысты карантин ережелері қатаң сақталып отыр. Ар-рахман мешітінің бас имамы Зиядолла Еміл қос орталық тұрғындарын Құрбан айтпен құттықтап, дендеріне саулық тіледі. Қайырымдылық мақсатында орталықтарға ет жеткізіп, алдағы уақытта да көмек қолын созатынын айтты.