Ел басына күн туып, жұртымыз үлкен сынаққа кезіккен кезеңдерде бабаларымыз тасаттық жасап, құрбан шалған. Қазір де жер-жаһанға тарап жатқан аты жаман індеттен аман-есен шығуды Жаратқаннан тілеп, еліміздің түкпір-түкпіріндегі мешіттерде құрбандық шалынып, садақа берілуде.

Осындай игі іс Қарағанды облысының Жаңаарқа және Жәйрем елдімекенінде жалғасын тапты. ҚМДБ-ның Қарағанды облысы бойынша өкіл имамы Бекқожа Өмірзақ Қазкенұлы бастаған мешіт имамдары мен жамағат бүкіл әлемді алаңдатып отырған COVID-2019 жұқпалы індетке қарсы Алла Тағаладан халқымыздың амандығы мен тыныштығын тілеп құрбандыққа бір жылқы, бір сиыр, үш қой шалды, дұға жасап, Жаратқаннан медет тіледі.