Бүгін Жамбыл облысы әкімдігінің баспасөз орталығында ҚМДБ Жамбыл облысының бас имамы, «Һибатулла Тарази» мешітінің бас имамы Бейбіт қажы Мырзагелдиевтың қатысуымен Рамазан айына байланысты онлайн брифинг өтті. 

Баспасөз мәслихатын «Ақ жол», «Жамбыл-Тараз», «Арай», «Ғұмыр дария», «Знамия Труда» газеттері мен «Қазақстан Тараз», «77» арналарының тілшілері онлайн тамашалады. Шарада Рамазан айының артықшылығы, мұсылман халқының аталған айды тойлауы, ондағы сауаптар мен ерекшеліктер сөз болып, Бас мүфти Наурызбай қажы Тағанұлының халыққа үндеуі жеткізілді. 

«Рамазан – он екі айдың сұлтаны, берекелі де кешірімі мол ай. Қасиетті айда адам баласы көбірек жақсылық жасап, ізгі амалдарды атқаруға тырысады. Ораза пендені тақуалыққа тәрбиелейді. Рамазан – Алланың мейірімі төгіліп, жұмақтың есігі айқара ашылатын, иманды күшейтуге мүмкіндік берілген берекелі ай. Биыл исі мұсылман жұртшылық асыға күткен қасиетті ай 24 сәуірде басталады. Ораза айт мерекесі 24 мамырда аталып өтіледі. Қадір түні – 19 мамырдан 20 мамырға қараған түні» - деп атап өтті Бейбіт Мырзагелдиев.

Сондай-ақ бас имам бүгінгі күллі әлемді аузына қаратып, уайым мен сарсаңға салған індет коронавирус пандемиясы салдарынан мешіттерде жамағатпен намаз оқуға уақытша тыйым салынғанын, тарауықтың мешіттерде оқылмайтынын еске салды. "Биыл пітір садақасы жан басына 370 теңге болып бекітілді. Ал биылғы підия мөлшері оразаның әр күні үшін 1700 теңге деп бекітілді. Карантинге байланысты Kaspi қосымшасының «Пітір» бөлімі қосылып, пітір садақа аударуға мүмкіндік туып отыр» деді Жамбыл облысының бас имамы.