ҚМДБ-ның Жамбыл облысындағы бас имамы Қанат Жұмағұл мен «Һибатулла Тарази» мешітінің имамдары дін жолында қызмет еткен молда Абдисатар Махкамұлының дүниеден өтуіне байланысты марқұмның отбасына барып, көңіл айтты.

Асқа қатысып, Құран оқып, сауабын бағыштап, Алланың ақиқат жолына өмірін арнаған дін маманының отбасына, туыстарына, жақындарына ҚМДБ Төрағасы, Бас мүфти Наурызбай қажы Тағанұлының көңіл айту жеделхатын жеткізді. 

«Жамбыл облысы Тараз қаласы «Миразиз» мешітінің молдасы, белгілі дін қызметкері Абдисатар Махкамұлының қазасы туралы қаралы хабар менің де қабырғамды қайыстырды. Жаратушы Иеміз Алла алдынан жарылқасын. Иманы саламат болғай. Марқұмның отбасына, туған-туыстарына өзімнің және Қазақстан мұсылмандары діни басқармасы ұжымы атынан қайғыра көңіл айтамын. Абдисатар Махкамұлы Алланың берген өлшеулі өмірін имамдық қызметке арнады және елдің бірлігі мен игілігі жолында бар күш-жігерін жұмсады. Киелі Әулиеата өңірінде 20 жылдан астам уақыт аралығында Ислам дінін насихаттауда, мешітті көркейту жолында қажырлы еңбек етті. Ол асыл дініміздің жанашыры еді. Қызмет еткен жылдары халқына, жамағатына сыйлы болды. Алла Тағала құлшылық үстінде қаза болған Абдисатар ағамызды мейіріміне бөлеп, жанын жәннаттық еткей. Қазаның арты қайырлы болғай. Жаратқан Жаббар Иеміз артында қалған ұрпағына жар болсын!» делінген жеделхатта.

Айта кетейік, Абдисатар Махкамұлы Тараз қаласындағы «Миразиз» мешітінің салынуына мұрындық болып, сол мешітте тапжылмай, 23 жыл бойы (1997 жылдан бері) имамдық қызмет атқарды. Қызмет еткен жылдары халқына, жамағатына сыйлы болып, талай шәкірт тәрбиелеп шығарды. Абдисатар ағамыз Алланың қалауымен жаназада уағыз айтып тұрған кезінде дүниеден өтті. Халықты намазға ұйытқан молданың жаназасына мыңдаған адам қатысты.