Қызылорда облыстық ішкі саясат басқармасына қарасты Дін мәселелерін зерттеу орталығының ұйымдастыруымен «Ақмешіт-Сырдария» орталық мешітінде Сыр имамдарына арналған семинар өтті.

«Діннің тұтастығы – елдің тұрақтылығы» тақырыбында өткен шараның басты мақсаты – теріс ағымның алдын алу және онымен күресті күшейту. Семинарға ҚМДБ-ның Қызылорда облысы бойынша бас имамы Болатбек Ұласқанұлы мен облыстық Ішкі саясат басқармасының басшысы Талғат Толыбайұлы арнайы қатысты.

Имамдардың жауапкершілік жүгін сезініп, тұрақты дамып әрі біліктілігін үнемі артырып отыруы – қазіргі заман талабы. Семинар жоспарына сәйкес, облыстық Дін мәселелерін зерттеу орталығының директоры Б.Камалов, директордың орынбасары А.Боранбаев, теолог Ж.Дәрібаев, Нұр-Мүбарак университетінің 4-курс студенті А.Кенжалы баяндама жасады. Олар «Дін тұтастығы – ел тұрақтылығы», «Зайырлылық және дінаралық қағидаттардың арақатынасы», «Теріс ағым идеологиясының зардабы», «Әлеуметтік желі әдебі», «Имам Әбу Ханифа мен Матрудидің пікір сабақтастығы» тақырыптары бойынша дәріс оқыды.