ҚМДБ Семей өңірі бойынша Жоламан Ақ мешітте сауат ашу курсының ұстазы Динара Тұрлықожанова мен «Үш қоңыр» медресе-колледжінің төртінші курс студенті Данагүл Кенжеқалидың ұйымдастыруымен шәкірттер арасында білім сайысы өтті.

Сайысқа Жоламан мешіті мен Жарқын ауылының мешітінде білім алып жүрген қыз-келіншектер қатысты. Екі топтан құралған сайыс үш кезеңнен тұрды. Қатысушылар алдымен 40 парыз бойынша сұрақтарға жауап берсе, екінші кезеңде дін мен дәстүр сабақтастығы бойынша белгілі бір тақырыпқа хадис пен мақал айтудан және Хәкім Абайдың қара сөздерін түсіндіруден сынға түсті. Ал үшінші кезеңде ақын өлеңдерін жатқа оқудан жарысты. Қатысушылар қазақты әлемге танытқан хәкім Абай өлеңдерін ана тілінде ғана оқып қоймай, орыс және ағылшын тілдерінде жатқа айтып, сайыс қызықты өтті.

Сайыс барысында белсенділік танытып, оқ бойы озық шыққан Жоламан Ақ мешіт шәкірттері алға шықты. Мешіт атынан барлық қатысушыларға сыйлықтар табысталды.