ҚМДБ-ның Талдықорған өңіріне қарасты Көксу аудандық «Зекет» қорының өкілі Бақыт Тілепбергенұлының ұйымдастыруымен Көксу бекетіндегі жаны жайсаң жамағат жиналып, жетім-жесір мұқтаж отбасыларға азық-түлік жеткізіп, көмір түсіріп берді.

Бабаларымыз ғасырлар бойы армандап өткен тәуелсіздік күні қарсаңында осындай сауапты істер жалғасын тапты. Қасиетті Құранда: «Сендер не жұмсасаңдар да Алла жұмсағандарыңның орнын қайта толтырады. Ол – ризық берушілердің ең қайырлысы» («Сәба» сүресі, 39-аят) деген аят бар. Сондай-ақ, хадисте де: «Әй, адам баласы, шығындал (бер), сонда саған да шығындалынады (беріледі)!» – деп анық айтылған (Бұхари, Муслим). Демек, шын ниетімен, Алла разылығы үшін жақсылық жасап, садақа берген адамның ризығы кеңіп, несібесі одан сайын арта түседі. Ал сараңдық танытқан адамның мал-дүниесі одан сайын кеми береді екен. Осындай игі іс-шараларға мұрындық болып жүрген Көксу ауданының бас имамы Еділбек қажыға, сауапты іске білек сыбана кірісіп,  қайырымдылыққа құлшынған көксулық бауырларға Алланың нұры жаусын!