Таң

Күн

Бесін

Екінті

Ақшам

Құптан

Павлодарлық имамдардың кеңейтілген отырысы өтті

mazhab.kz 16.10.2019 327 0 пікір
Павлодарлық имамдардың кеңейтілген отырысы өтті

«Мәшһүр Жүсіп» орталық мешітінде аудан, қала имамдарының кеңейтілген отырысы өтті. Онда күн тәртібінде тұрған мәселелер талқыға түсті. Жиынға Қазақстан Мұсылмандары діни басқармасының Павлодар облысындағы өкілі Жолдас қажы Қоспақұлы төрағалық етті.

Өкіл имам ең алдымен алдағы аптада Нұр-Сұлтан қаласында өтетін ІІІ Республикалық имамдар форумына дайындық барысын пысықтады. Ауқымды шараға біздің өңірден 17 имам қатысады.

«Алда Мәуліт мерекесі келе жатыр. Оны жоғары деңгейде, мәнді де мазмұнды етіп өткізуге тиіспіз. Сондықтан, дайындық жұмыстарын ширатуды тапсырамын», – деді Жолдас Қоспақұлы.

Өкіл имам атап өткендей, биыл Қазақстан Мұсылмандары діни басқармасының төл газеті «Munara» жарыққа шығады. Қазір аталған басылымға жазылу жүріп жатыр. Жолдас Қоспақұлы ерекше мазмұнмен шығатын газеттің облыстың әрбір ауылына таралуы керектігін ескертті.

Жолдас Қоспақұлы халал стандарт, «Зекет» қайырымдылық қоры, оқу-ағарту, жат ағымдармен күрес бағытындағы жұмыстарды одан әрі жандандыру керектігін еске салды. Сондай-ақ өңірдегі дін қызметкерлерінің білімін арттыру мәселесіне ерекше тоқталды. Бұл ретте, оларды екі айлық курстарға жіберіп тұру керектігін ескертті.

Отырыс барысында мешіттердің қысқы дайындығы да пысықталды. Өкіл имам өз сөзінде «Әбу Бәкір Сыддық» медресесінің жылу қазандығы демеушілердің көмегімен ауыстырылып жатқанын жеткізді.


Пікірлер (0)

Тіркелген қолданушылар ғана пікір қалдыра алады. Сайтқа кіру


Соңғылар

Мұсылман діни күнтізбесі