«Ақниет» ақпараттық-насихаттау және оңалту орталығы» Қоғамдық қоры Қазақстан Республикасының Ақпарат және қоғамдық даму министрлігі сондай-ақ КЕАҚ «Азаматтық бастамаларды қолдау орталығының» (CISC) қолдауымен ҚМДБ мен Өзбекстан арасындағы дін істері бойынша мәмілеге сай Түркістан облысында еларалық тәжірибе алмасу жалғасып жатыр. Өткен жолы көрші мемлекеттен 7 өкіл келіп, Сайрам, Сарыағаш, Келес аудандарында насихат жүргізіп кеткен-ді. Араға біраз уақыт салып, екі теолог-имам тағы келді.

Ёрқын Қултаев пен Хасан Қадиров Сайрам аудандық әкімдігінде деструктивтік ұстанымдағы азаматтармен жалпы кездесу өткізді. Сондай-ақ, олар "Ашбұлақ", "Халнияз ата", "Ортабұлақ", Айнабұлақ", "Халдар", Қалдаман", "Маллахан", "Сүлеймен баба", "Сайд Әли қажы", "Ынтық Иманәлиев" мешіттерінде жамағатпен жүздесті. 

Өзбекстандық әріптестер Сайрам ауданының округ имамдарымен бас қосты. Семинар-тренингте екі жақ теріс жолда жүргендермен жұмыс істеу тәсілдері бойынша тәжірибе алмасты.