Қостанай облысының Бас имамы Бектұрсын Торғайбайұлы Алматы қаласына іссапармен барып, Нұр-Мүбарак Египет Ислам мәдениеті университетінде білім алып жатқан қостанайлық студенттермен кездесті.

Сапар барысында ол университет проректоры, PhD докторы Оңғар Ершат Ағыбайұлымен жүздесіп, қызметіне табыс тілеп, ұлттық тарих пен салт-дәстүрге қатысты кітап тарту етті. Өз кезегінде проректор да құрмет көрсетіп, сый-сияпат жасады.

Кездесу аясында студенттердің оқу үлгерімі, қосымша дәрістерге қатысуы, тәжірибеден өтуі және оқу бітіргеннен кейін өңірге оралып қызмет атқару мәселелері талқыланды.

Іссапардың негізгі мақсаты – жастарға қолдау білдіру, білімге ынталандыру және бітіруші түлектерді туған жерге қызметке шақыру. Осы бағытта Бас имам студенттерге бір реттік шәкіртақы табыстап, арнайы дастарқан жайды.