Бүгін Қазақстан мұсылмандары діни басқармасының төрағасы, Бас мүфти Наурызбай қажы Тағанұлы елордадағы «Әзірет Сұлтан» мешітінде тарауық намазына қатысып, жамағатқа насихат айтты.  

«Ардақты Пайғамбарымыз (оған Алланың салауаты мен сәлемі болсын): «Туысқандық қарым-қатынасты жалғаушы адам, (ол – оған қандай қарым-қатынас жасаса) тура солай ғана жауап беретін адам емес. Шындығында, туысқандық қарым-қатынасты жалғаушы – ол туыстарының онымен қарым-қатынасын үзгеніне қарамастан, олармен араласуын үзбейтін адам!» – деген.

Асыл дініміз мұсылмандарға туыстармен әркез байланыста болуға бұйырып, туыстық қатынасты үзуден сақтандырған. Хадисте келген «Әл-уасил» (الْوَاصِلُ) мен «әл-мукафи» (المكافى) сөздері туыстық байланыстың түрін сипаттайтын сөздер. Адамды туыстық қатынасты сақтауы мен үзуіне байланысты үш түрлі болады:

Бірінші: «Әл-қатиғу» (القاطع): Туыстық қатынасты үзіп қойған адам. Олар қатынас жасаса да, олармен қарым-қатынас жасаспайды, қал-жағдай сұраспайды, араласпайды.

Екінші: «Әл-мукафи» (المكافى): Туыстардың арасында өзімен байланыста болғандарымен ғана байланыста болады. Өзіне көмек қолын созғандарға ғана көмек қолын созады.

Үшінші: «Әл-уасил» (الْوَاصِلُ): Туыстық қатынасты сақтайтын, оларға жақсылық жасайтын адам. Ол туыстары байланысты үзіп қойса да оны жалғастырады. Оларға көмек, сыйлық берсе, қарымта көмек күтпейді. Жақсылықта санаспайтын адам. Туыстық қатынасты жалғауға: оларға жақсылық жасау, қиындықта болса қасынан табылып, жәрдемдесу, зиярат жасап тұру, мұқтаждарына көмектесу сияқты істер жатады»,- деді Наурызбай қажы Тағанұлы.

Тарауық намазынан кейін жамағатпен бірге еліміздің амандығы мен тыныштығы, халқымыздың бірлігі мен берекесі үшін дұға жасалды.