Қасиетті жұма күні Көкше жұрты имани оқиғаның куәсі болды. Тілеулес қажы атындағы Құран жаттау орталығы салтанатты жағдайда ашылды. Бұл шараға зиялы қауым, діни қызметкерлер және БАҚ өкілдері қатысты.

Рәсім Құран оқумен бастау алып, құрбан шалумен жалғасты. Алғашқы сөз сөйлеген ҚМДБ-ның Ақмола облысы бойынша өкілі, Науан хазірет мешітінің бас имамы Қуаныш Сәбит барша қауымды асыл дініміз үшін осы бір елеулі оқиғамен құттықтады. Көкше елінде тұңғыш Құран жаттау орталығы ашылып отыр. Бұл жастарымызды имандылыққа тәрбиелеудің қиелі ордасына айналады.

Құран жаттау орталығын ашудың алқызыл лентасын облыс имамы Қуаныш Сәбит, Көкшетау қаласының құрметті азаматы Болат Көшімбаев, Көкшетау қалалық ардагерлер кеңесінің төрағасы Шияп Әлиев және еңбек ардагері, қажы Мүтәллап Ғабдоллаұлы кесіп, аталарымыз баталарын берді.

Бұл орталықтың ашылуына ұйытқы болған Болат Көшімбаевқа елдің ықыласы жоғары. Ол өзінің еңселі коттедж үйін жас ұрпақ өкілдерінің Алланың сөзімен сусындауға беріп отыр.Аяулы жары, Тілеулес қажының есімі берілген бұл орталықта алдағы уақытта Құран жаттау сабақтары өтетін болады.

Өкіл имам Қуаныш Сәбит жиналған қауым алдында Бас мүфтидің бұйрығымен Құран жаттау орталығының директоры болып тағайындалған Теміржан қари Өтежанұлын таныстырды.

Осы күні жұма намазында жаңа орталықтың күрделі жөнделуіне сүбелі үлес қосқан Асхат Адайұлы Бас мүфтидің Алғыс хатымен марапатталды.