Өкіл имам Төлеби Оспан Ақтөбенің бірқатар аудандарында «Жаназа және жерлеу рәсімдері» кітабын таныстырды.

Ақтөбеде «Халықтың қауіпсіздігін қамтамасыз ету» жобасының аясында ақпараттық-түсіндіру жұмыстары жүруде. Жобаның «Ауқымды түсіндіру жұмыстары және рухани сұрақтар» бағытындағы мобильдік топ бүгінгі күнге дейін Хромтау, Мұғалжар және Темір аудандарында жұмыс жасады. 19-21 қазан аралығында түсіндіру жұмыстары Мартөк ауданында жалғасын табады.

Өкіл имам осы аталған төрт ауданның да тұрғындарымен кездесіп, оларға «Жаназа және жерлеу рәсімдері» кітабын таныстырды. Кітап мазмұнына кеңінен тоқталып, мұндағы басты мақсат – діни рәсімдердің шариғат шарттарына сай бірізді атқарылуын қатамасыз ету және ысырапқа жол бермеу екендігін айтты. Сондай-ақ, облысқа ортақ садақа мәзірі мен Үндеу мәтіндері таратылды.

Естеріңізге сала кетейік, сәуір айында Ақтөбе қаласында «Салт-дәстүр және діни рәсімдер» атты ғылыми-танымдық конференция өткен болатын. Конференция қатысушылары облысқа ортақ садақа мәзірі мен діни рәсімдердің шариғат талаптарына сай бірізді атқарылуы туралы Үндеу қабылдаған болатын.

Кітап таныстырылымы өзге аудандарда да жалғасын табатын болады.