Шымкент қаласы облыстық орталық мешітінде Қазақстан мұсылмандары діни басқармасы ОҚО бойынша өкілдігінің ұйымдастыруымен бұқаралық ақпарат құралдарының төл мерекесі қарсаңында ҚМДБ-ның төрағасы, Бас мүфти Ержан қажы Малғажыұлының БАҚ және зиялы қауым өкілдеріне арнайы ауызашар дастарханы жайылды.
Шараға ҚР ОҚО бойынша журналистер одағының басшылығы мен мүшелері, облыстық ардагерлер кеңесі мен облыстық «Әжелер мектебінің» мүшелері, жергілікті телеарна тілшілері, ақын-жазушылар т.б. жалпы саны 310 кісі қатысты.
Шараны ҚМДБ-ның ОҚО бойынша өкіл имам орынбасары әрі БАҚ бөлімінің жетекшісі Мұхамеджан Естеміров ашып, ҚМДБ-ның төрағасы, Бас мүфти Ержан қажы Малғажыұлы хазреттің құттықтауын жеткізді.
Мерекелі ақ дастархан басында ҚМДБ Ғұламалар кеңесінің мүшесі Зәріпбай Жұманұлы, ҚР ОҚО бойынша журналистер одағының басшысы Айгүл Қапбарова, ХҚТУ-нің ұстазы, профессор Әмір Мұсақұлов, Республикалық «Қазақстан жолы» газетінің бас редакторы Оңғар Тәжиев және ақын, журналист Нармахан Бекалыұлы мырзалар ақ тілек тіледі.

Шара барысында Қазақстан мұсылмандары діни басқармасының төрағасы, Бас мүфти Ержан қажы Малғажыұлының бастамасымен және Ғұламалар кеңесінің бекітуімен жарық көрген «Жаназа және жерлеу рәсімдері» кітабының тұсаукесер рәсімі өтті.