ҚМДБ-ның Атырау өңіріндегі өкілі, «Иманғали» орталық мешітінің бас имамы Батыржан Берденұлының бастамасымен ҚМДБ төрағасы, Бас мүфти Ержан қажы Малғажыұлының «Мүбәрак Рамазан» атты кітабы бойынша жас жамағаттар арасында білім сайысы өткен болатын.

Мешіттің наиб имамы А.Жұмабекұлы, М.Мұстафаев, сондай-ақ, ҚМДБ Жалпы және жастар ісі бөлімінің Атырау облысы бойынша жетекшісі Арман Урумбаевтар қазылық еткен сайыста жас жамағат «Рамазан», «Шәббаб» және «Раийан», «Шаһада» атты 4 топқа бөлініп, өзара бақ сынасқан еді. Сайыстың қорытындысы бойынша «Раийан» тобы жүлделі 1-орынға ие болса, «Шәббаб»тобы 2-ші, «Рамазан» тобы 3-ші орындар биігінен көрінді.

2-маусым, қасиетті жұма күні өкіл имам сайыс жеңімпаздарын марапаттап, сыйлықтарын тарту етті. Атап айтқанда, 1-орын алған «Раийан» тобына Астана қаласына өтетін «EXPO – 2017» көрмесіне барып-қайту жол билеттері тарту етілсе, 2-орын алған «Шәббаб» тобының Рамазан айында қаладағы мейрамханаларда 2 күн ауызашарда тегін тамақтануына қажетті қаражат бөлінді. Ал, 3-орын алған «Рамазан» тобына бағалы сыйлық тарту етіліп, «Шәббаб» тобына ынталандыру сыйлықтары табыс етілді.