Қызылжар өңірінің күре тамыры тәрізді болған көк Есіл өзені биыл қатты тасыды. Жүздеген үйлер суда қалған осындай жағдайда өңір мешіттері ҚМДБ ұйымдастырған «Қайырымдылық керуені» акциясына белсене қатысты.

Ғ.Мүсірепов атындағы, Айыртау, Шал ақын және Тимирязев аудандарының мешіттері өңірдегі қызыл су басқан бірінші елді мекен – Рузаевка ауылына қол ұшын созды. Ал6 басқа аудандар мен «Қызылжар» орталық мешіті 350 мың теңге ақшалай және 2,5 миллион теңгенің заттай тауарына қол жеткізді. Атап айтқанда, 600 келі ұн, 80 жұп аяқ-киім, 20 кілем, киім-кешек, төсек-орын, сондай-ақ қант, май, шай, макарон тағамдары, сабын, кір жуу ұнтағы, ас содасы сияқты заттар жиналды.

Осыған байланысты облыстық телеарнаға сұхбат берген ҚМДБ-ның СҚО бойынша өкіл имамы, «Қызылжар» орталық мешітінің Бас имамы Кенжетай қажы Байкемелұлы өңір мешіттерінің қосқан үлесіне ризашылығын білдірді.

«Қайырымдылық керуеніне» түскен заттар су тасқынынан зардап шеккен тұрғындарға жылу жинау орталығына тапсырылды.

Қайырымдылық шаралары Рамазан айында да жалғасын табатын болады.

«Қызылжар» орталық мешітінің

баспасөз қызметі