Tań

Kún

Besіn

Ekіntі

Aqsham

Quptan

КОРОНАВИРУСТЫҢ АЛДЫН АЛУ ШАРАЛАРЫНА ҚАТЫСТЫ ҚМДБ ҮНДЕУІ

ҚМДБ баспасөз қызметі muftyat.kz 12.03.2020 19651 2 пікір

Бүгінде әлем жұртшылығын дүрліктірген коронавирус көптеген елдерге тарап үлгерді. Вирусты жұқтырған адам саны артуда. Бұл дерт бізді де алаңдатып отыр. 

Сол себепті, әр адам өз отбасына, ұжымына, туған-туыстарына жауапты тұлға болғандықтан, әрқашан сақтық шараларын жасауы тиіс. Пайғамбарымыз Мұхаммед (оған Алланың салауаты мен сәлемі болсын): «Өзіне де, өзгеге де зиян келтіруге болмайды», – деген. Ал халқымызда «Ауырып ем іздегенше, ауырмайтын жол ізде» деген нақыл бар.

Осы ретте Қазақстан мұсылмандары діни басқармасы барша мұсылман қауымын көпшілікпен өтетін ас-садақа мен жиындарды, іс-шараларды мүмкіндігінше кейінге шегеруге шақырады.

Ал жамағатпен оқылатын бес уақыт намазға қатысқан жағдайда құлшылықтан кейін қол беріп амандасудан, бір орынға жиналып дұға етуден сақтануымыз аса қажет. Өйткені, құлшылықтан кейін қол алып амандасу намаз шарттарына жатпайды.

Мешітке келуші мұсылман жамағатын төмендегі сақтық шараларға мән беруге шақырамыз:

  1. Мешітке бетперде (маска) киіп келу;
  2. Намаздан тыс мешітте топтаспау;
  3. Мешітке үйден дәрет алып келу;
  4. Мешітке кіргенде және намаздан соң қол беріп амандаспау;
  5. Намаздан кейін көп кідірмей мешіттен шығу;
  6. Жамағатпен оқылатын намазға балиғатқа толмаған балаларды алып келмеу;
  7. Қариялардың, науқастар мен әйелдердің жамағат намазына қатыспағаны абзал.

Пайғамбарымыз (оған Алланың салауаты мен сәлемі болсын) өсиетінде: «Бір жерде жұқпалы аурудың бар екенін білсеңдер, ол жерге бармаңдар, ал егер сол жерде болсаңдар, сыртқа шықпаңдар», – деген (Муслим).

Сондықтан барша жамағатты өзі мен отбасының, еліміз бен жеріміздің амандығы үшін Жаратқанға дұға жасауға шақырамыз.

Алла Тағала жер бетіндегі күллі адамзатты түрлі апаттан, жаман аурудан сақтағай! Әмин!

Pіkіrler (2)

Тіркелген қолданушылар ғана пікір қалдыра алады. Сайтқа кіру

Абдраимов | 13.03.2020 04:20

Ассалаумалейкум уа рахматуллаһи уа баракатһу! Жұма намаздарда қалай жасаймыз? 

Администратор | 13.03.2020 11:06

Уағалейкумассалам уа рахматуллаһи уа бәрәкәтуһ! Нені қалай жасаймыз дейсіз?

Ереке | 13.03.2020 08:12

Әссәләм'әлейкум уә рохмәтулләһи уә бәрокәтуһ!

Негізгі жасалынып жатқан шаралар жалпы дұрыс шығар, бірақ осы сақтық шаралар пунктіне тағы біреуін қосқаныңыз дұрыс болатын сияқты:

Мешітте Жұма намазынан кейін н/е басқа да намаздардан кейін мешіт ішіндегі ауасын тазарту және де арнайы дезинфекция жұмысын жүргізу.

Аллаһ береке берсін, еліміз аман, дендеріміз әп түрлі жаман аурулардан алыс болсын!

Администратор | 13.03.2020 11:08

Уағалейкумассалам уа рахматуллаһи уа бәрәкатуһ! Дезинфекция жасау жөнінде барлық мешітке тапсырма берілді. Ол мешіттің ішкі жұмысы болғандықтан Үндеуге қоспадық.

Sońǵylar

Мұрағат