Қарағанды қалалық «әл-Машани» мешітінің ұйымдастыруымен «Адамзаттың ардақтысы Әз Мұхаммед» атты мәуліт кеші өтті .
Берекелі іс-шараға ҚМДБ Төрағасының орынбасары, наиб мүфти Сансызбай Құрбанұлы, Қарағанды облысының бас имамы Өмірзақ Қазкенұлы және «Нұр-Мүбарак» университетінің ұстазы Амангелді Тілекқабыл арнайы қатысып, аймақ тұрғындарын Мәуліт мерекесімен құттықтады.
Рухани кеште «әл-Машани» мешітінің имамы Жанболат Қошкелдіұлы уағыз-насихат айтып, кеш қонақтарына ілтипатын жеткізді. Бұдан кейін «Бала қажы» мешітінің наиб имамы Сұлтан Мұратұлы Бәрзәнжи мәулітін оқып, Пайғамбарымызға (оған Алланың салауаты мен сәлемі болсын) сәлем-салауаттар жолданды.
Мәуліт мерекесінде Пайғамбарға (оған Алланың салауаты мен сәлемі болсын) деген сүйіспеншілік жайлы уағыз айтылып, жамағатқа Пайғамбарымыздың (оған Алланың салауаты мен сәлемі болсын) өміріне қатысты сұрақтар қойылды. Сондай-ақ, «әл-Азһар» университетінде білімін жетілдіріп жатқан имам Елдос Қуандықұлы кештің құрметті қонақтарын арнайы бейне байланыс арқылы құттықтап, ақжарма тілегін жеткізді.
Мәуліт кешінің құрметіне жайылған дастархан басында Құран оқылып, еліміздің амандығы мен тыныштығы үшін дұға жасалды.
Pіkіrler (0)
Тіркелген қолданушылар ғана пікір қалдыра алады. Сайтқа кіру