Әлемде дүрбелеңге салған СOVID-19 жұқпалы індетіне байланысты ҚМДБ-ның Шымкент орталық мешіті «Жүрек жылуы», #Бізбіргеміз қайырымдылық шарасын ұйымдастырды.

Шымкент қаласының бас имамы Бақтыбай Бейсенбаев, имамдар Мұхамеджан Естеміров, Азамат Әбдікерімұлы, Айбек Азимбаев, Бердалы Жәміш және қалалық «Зекет» қоры мен «Жәннатул Фирдауси» қоғамдық қорының ерікті белсенді жастары қала көшелерінде қайырымдылық шарасын өткізіп, жұқпалы індетті жұқтырып алмау үшін халыққа медициналық бетперде таратып, сақтану жолдарын түсіндірді.

Айта кетсек, шара барысында қала тұрғындарына ҚМДБ-ның төрағасы, Бас мүфти Наурызбай қажы Тағанұлы хазреттің халыққа үндеуі насихатталып, қайырымдылық негізінде 1000 дана бетперде тегін таратылды.