Бүгін Алматы қаласында өткен «Цифрлық кеңістіктегі ислам: көріністері, платформалары мен мүмкіндіктері» халықаралық ғылыми-тәжірибелік конференция аясында Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы «Цифрлық кеңістіктегі ислам (Қазақстан мысалында)» кітабының танытымына қатысты.

Қазақстан мұсылмандары діни басқармасының 35 жылдық мерейтойына арналған конференция барысында Бас мүфти Наурызбай қажы Тағанұлы, Шамшәдин Керім, Бурханадин Абдилхаким және Сырым Шакизаданың авторлығымен жарық көрген «Цифрлық кеңістіктегі ислам (Қазақстан мысалында)» еңбегінің тұсауын кесті.

Іс-шарада Бас мүфти Наурызбай қажы Тағанұлы сөз сөйлеп, ислам дінінің ғылым мен технологияны дамытуға үндейтінін атап өтті.

«Ғылыми жаңалықтар қоғам мен адамзат өміріне пайдалы болса, оны шариғат та құптайды. Ислам діні адам баласының ақыл-ойының дамуын қолдайды. Мұсылман заманауи технологияны меңгеріп, оны қоғамға пайдалы іске бағыттайтын, әрі рухани тәрбие мен этикалық жауапкершілікті ұмытпайтын тұлға болуы керек», – деді Бас мүфти.