Осыдан бір ай бұрын облыстық «Қызылжар» орталық мешітінде «Zerde» оқырмандар клубы ашылған болатын. Бүгінде клубқа «Әйел-қыздар» секторының 30-дан астам мүшесі қатысуда.

Клубтың негізгі мақсаты – кітап оқу мәдениетін қалыптастыру, жамағаттың ой-өрісін кеңейтіп, рухани дамуына үлес қосу. Сонымен қатар «Бір айда бір кітап» жобасы аясында таңдалған туындыларды оқып, оның мазмұнын бірлесе талқылау көзделген.

Алғашқы айда қатысушылар Бауыржан Момышұлының «Ұшқан ұя» шығармасын оқып, ондағы тәлім-тәрбие мен отбасылық құндылықтар жөнінде пікір алмасты. Сондай-ақ кітап оқудың маңыздылығы, уақытты тиімді пайдалану және рухани-зияткерлік дамудың жолдары талқыланды.

Кездесу барысында аталған шығарма негізінде шағын тестілеу ұйымдастырылды. Қорытындысында өңірдің Бас имамы Хамзат Қажымұратұлы үздік қатысушыларды дипломдармен және бағалы сыйлықтармен марапаттады.