Астана қаласының бас имамы Ерболат Жүсіповтің басшылығымен елорда мешіттерінде қайырымдылық бағытындағы игі іс-шара ұйымдастырылды.

Атап айтқанда, «Жылу сыйла» акциясы аясында Қазақстан мұсылмандары діни басқармасының «Зекет және қайырымдылық» қорының басшысы Мақсатбек Қайырғалиев, Астана қаласының бас имамы Ерболат Жүсіпов, сондай-ақ «Әс-Сәлам», «Ар-Рахман», «Ырыскелді қажы» мешіттерінің бас имамдары қатысты.

Жомарт жандардың қолдауымен 120 мұқтаж отбасыға жалпы көлемі 63 тонна көмір үлестірілді. Шара барысында Астана қаласының бас имамы Ерболат Нұрылдаұлы қақаған қыс мезгілінде көрсетілген мұндай көмектің аса маңызды екенін атап өтіп, қайырымдылыққа негізделген игі бастамалар алдағы уақытта да өз жалғасын табатынын жеткізді.