Солтүстік Қазақстан облыстық «Қызылжар» орталық мешітінің ұйымдастыруымен 7-18 жас аралығындағы шәкірттер арасында марқұм Нұрмағамбет Балтабайұлының рухына бағышталған дәстүрлі V облыстық Құран жарысы өтті.

Игі шарада Құран Кәрімді жаттауға ниет еткен 70-ке жуық жас шәкірт бақ сынады. Сайыс келесі номинациялар бойынша өткізілді: 10 сүре, 22 сүре, жарты пара, бір пара, екі пара және үш пара.

Жарыс аясында шәкірттер Құран аяттарын ғана емес, сондай-ақ түрлі тақырыптағы Пайғамбарымыздың (оған Алланың салауаты мен сәлемі болсын) хадистерін, қазақтың ғұламалары мен даналарының нақыл сөздерін жатқа айтып, көрерменнің ықыласына бөленді.

Қазылар алқасының шешімі бойынша жеңімпаздар келесідей анықталды:

10 сүре бойынша – Әсия Бақытжанқызы

22 сүре бойынша – Фатима Серік

Жарты пара бойынша – Аяла Сүндет

1 пара бойынша – Мухаммад Шәріпов

2 пара бойынша – Зулфуқар Мухсина

3 пара бойынша – Азамат Төлеухан

Игі іске өңірдегі дін жанашыры демеушілік танытып, жеңімпаз және жүлдегер шәкірттерге ақшалай сыйлықтар табысталды.

Аталмыш Құран байқауы — жас ұрпақтың имандылыққа, рухани құндылықтарға деген қызығушылығын арттырып, Құран жаттауға деген ынтасын оятатын тағылымды бастама екені сөзсіз.