Алматы қаласы Бостандық ауданының «Орбита-3» мешітінде Ораза айт мерекесіне орай балалар үйінің тәрбиеленушілері мен мүгедектігі бар балаларға арналған арнайы шара ұйымдастырылды.

Шараның ашылуында Алматы Орталық мешітінің наиб имамы Бауыржан Көптілеуов пен «Орбита 3» мешітінің бас имамы Орынбасар Абдуллаұлы сөз сөйлеп, жиналғандарды Ораза айт мерекесімен құттықтады.

Балаларға түрлі заманауи және ұлттық ойындар, зияткерлік сайыстар мен көңіл көтеретін бағдарламалар ұсынылды. Аниматорлармен бірге өткен шара барысында балалар қызықты қойылымдар тамашалап, мешіт тарапынан тәттілер мен сыйлықтар үлестірілді.

Мерекенің басты құндылықтары – мейірімділік, қайырымдылық және бауырмалдық ұғымдары кеңінен насихатталды. Балалардың қуанышты жүздері мен ризашылыққа толы жүрегі шараның басты нәтижесі болды. Қатысушылар осындай игі бастамалардың жалғасын тауып, мұқтаж жандарға көмек көрсету дәстүрі әрдайым жандана берсін деген ниет білдірді.